गाँव बनसाँकरा म धूमधाम ले मनाइस हनुमान जन्मोत्सव
सिमगा - हनुमान जी के जन्मोत्सव के शुभ अवसर म आज महावीर देवालय (गुड़ी चौक) म बिहिनिया ले हनुमान जी ल चोला अर्पण के सँग विधि-विधान ले पूजा-पाठ सम्पन्न होइस। मंदिर परिसर म भक्ति मय माहौल बनगे रहिस, जिहा भक्त मन जय श्री राम अउ जय बजरंगबली के जयघोष करत रहिन। संझा बेरा मंगल मानस परिवार के डाहर ले सुंदरकांड पाठ अउ भजन-कीर्तन के आयोजन कराय गीस, जेमा हनुमान जी के जन्म, बल, भक्ति अउ राम जी प्रति समर्पण के विस्तार ले बखान करे गीस। भजन मंडली के मधुर आवाज ले पूरा वातावरण गूंज उठिस। ए आयोजन म गाँव के सब पारा-मोहल्ला ले भारी संख्या म श्रद्धालु मन उपस्थित रहिन। सबो मन मिलके श्रद्धा अउ भक्ति भाव ले हनुमान चालीसा, आरती गाइन अउ प्रसाद ग्रहण करके कार्यक्रम के सफल बनाइन। खास बात ये घलो आय कि गाँव बनसाँकरा म हनुमान जन्मोत्सव हर साल बड़े धूमधाम ले मनाय जाथे। श्री मंगल मानस परिवार के द्वारा बारो महीना हर मंगलवार संगीतमय रामायण पाठ कराय जाथे, जेन ह गाँव के धार्मिक वातावरण ल अउ मजबूत बनाथे। अऊ माँ महामाया मंदिर म हर रोज आरती के बाद हनुमान चालीसा अउ हनुमानाष्टक के नियमित पाठ होथे, जेमा लइका मन के विशेष सहभागिता देखे ला मिलथे। ए सब ले गाँव म धार्मिक संस्कार, एकता अउ भक्ति के भावना निरंतर बढ़त जावत हे।
ए कार्यक्रम म गाँव के वरिष्ठ नागरिक, युवा वर्ग अउ महिला समूह के सक्रिय सहभागिता घलो सराहनीय रहिस, जेन मन मिलके व्यवस्था, सजावट अउ प्रसाद वितरण के जिम्मेदारी निभाइन । मंदिर परिसर ल आकर्षक फूल सजावट अउ विद्युत रोशनी ले सजाय गीस, जेन ले पूरा माहौल भक्तिमय अउ मनमोहक दिखत रहिस। आयोजन के अंत म गाँव के सुख-शांति, समृद्धि अउ खुशहाली खातिर विशेष प्रार्थना करे गीस। ए प्रकार ले बनसाँकरा गाँव फेर एक बार भक्ति, एकता अउ संस्कृति के सुंदर मिसाल प्रस्तुत करिस।
CNI NEWS सिमगा से ओंकार साहू की रिपोर्ट
No comments:
Post a Comment
Please do not enter any spam link in the comment box.